Сінагога | Столін

Больш фотаздымкаў (24) >>

Змураваная ў цэнтры города ў 1792 г., столінская сынагога з'яўляецца адным з найбольш вядомых помнікаў іўдзейскай рэлігіёзнай архітэктуры на Беларусі канца XVIII ст. Яна функцыявала як культавы храм да 1942 г. У час 2-й сусветнай вайны фашыстоўцы растралялі ўсю іудзейскую абшчыну. Храм страціў сваё функцыянальнае прызначэнне і выкарыстоўваўся як склад. З часам будынак заняпаў, але ёсць надзея, што ён будзе адноўлены - ужо зроблена дакумэнтацыя на рэстаўрацыю сынагогі.

Будынак у плане блізкі да квадрата з трохі скошанымі з паўночна-заходняга боку вугламі. Кампактны дзьвухсветлавы аб'ём накрыты вальмавым дахам з невялікім трохвугольным франтонам над усходняй сцяной. Фасады расчлянены на 2 ярусы гарызантальным паясом і завершаны прафіляваным карнізам. Аконныя праёмы ніжняга яруса лучковыя, верхняга — з паўцыркульнымі завяршэннямі, аформлены сандрыкамі і размежаваны пілястрамі. Унутры прастора расчлянена на 3 нефы 6 круглымі калонамі, каторыя звязаны лучковымі аркамі. Пры ўваходзе з паўднёва-заходняга боку знаходзіўся другі ярус для жанчын. Сцены дэкараваны ў ніжнім ярусу паўкалонамі, у верхнім — адзіночнымі пілястрамі, а таксама фрэскавай размалёўкай, імітуючай архітэктурную пластыку: канелюры, фрыз, філёнкі, нішы. З паўднёва-заходняга боку знаходзяцца 3 уваходы. Сынагога — помнік архітэктуры пераходнага перыяду ад барока да класіцызму.

Крыніца:
Т. В. Габрусь
Збор помнікаў гісторыі і культуры Беларусі. Брэсцкая вобласць
Мінск, Беларуская Энцыклапедыя, 1986

Дз. Барысаў