Выбраныя здымкі
Савецкія ДОТы каля Гершон
Дот (умоўна абазначаны, як І) знаходзіцца паміж вёскамі Гершоны і Бернады Брэсцкага раёна. Пабудаваны ў 1940-41 годзе, адносіцца да 2-й роты 18-га асобнага кулямётна-артылерыйскага батальёна (АКАБ) 62-га Брэст-Літоўскага ўмацаванага раёна (УР). Матэр’ял – бутажалезабетон (бетон з арматурай і шчэбенем). Меў на ўзбраенні 2 кулямёты “Максім”. Крыху недабудаваны, не абсыпаны зямлёй. Амбразуры чамусьці закладзеныя цэглай. Верагодна, дот удзельнічаў у баі 22-23 чэрвеня 1941 года.
Дот (ІІ) знаходзіцца ў вёсцы Гяршоны, быў пабудаваны ў 1940-41 годзе, адносіцца да 2-й роты 18-га АКАБ 62-га УР. Матэр’ял – бутажалезабетон. Дот малы па памерах, але прызначаны для моцнага ўзбраення – 2 гарматы калібра 76.2 мм. Пабудаваны каля парахавога склепа царскіх часоў, разам з ім і яшчэ двума дотамі ўтварае адзіны абарончы вузел. На жаль, агульны здымак зрабіць немагчыма, а на прыведзеным бачна толькі невялікая частка парахавога склепа (выступае справа ад дота).
Дот (ІІІ) знаходзіцца каля чыгункі недалёка ад прыпынку “Бернады”. Пабудаваны ў 1940-41 годзе, адносіцца да 2-й роты 18-га АКАБ 62-га УР. Матэр’ял – бутажалезабетон. Узбраенне – 45-мм супрацьтанкавая гармата і кулямёт “Максім”. У баях гэты дот не ўдзельнічаў.
Тлумачэнні для чарцяжоў: літарай К абазначаны калодзеж, трохкутнік у кружку паказвае накірунак аварыйнага выхаду пад полам, а кружок у квадраце абазначае перыскоп. Прастакутнікі абазначаюць гільзаадвод, калі знаходзяцца ў казематах з амбразурамі. У астатніх казематах яны паказваюць дапаможнае невялічкае памяшканне пад полам (ягоны аб'ём чамусьці заўсёды 5 кубаметраў).
Апісанне складзенае па матэр’ялах даследчай групы “Крапіва”, пры чым выкарыстоўваліся дадзеныя палявых даследванняў і звесткі з правераных пісьмовых крыніцаў, якія можна лічыць даставернымі.
Вадзім Шорах,
даследчая група "Крапіва"