Кушлікі - фота і помнікі

Гісторыя Кушлікаў

У рэвізіі Полацкага ваяводзтва, зьдзейсьненай у 1552 годзе маршалкам Янам Кмітам і канюшым троцкім Марцінам Падцэўскім, Кушлікі згадваюцца неаднойчы:
“Іван Клімяціч Зубрык зь сестрынцом сваім Іванам Арцемовічам маюць іменіе айчызнае і дзедізнае ў Кушліках, а другое ў Боркавічах на Дрысе.”
“Той жа Баркулаб (Іванавіч Корсак – М.Б.) мае іменіе выслужонае на гаспадары яго міласьці Жыгімонце на імя сяло Кушлікі, двор Кушлікі з пашняю, к таму ж двару людзей айчызных дымоў 6, з тых людзей яму прыходзіць мёду 20 пудоў, налуконнага грошай 40 (выплаты з продажу мёда – М.Б.). Тыя ж людзі масты на дарозе Дрыскай дзяльніцы свае мосьцяць, на старожы замкавыя 6 грошай даюць, таго ж двара людзей вольных дымоў 11, а агароднікаў два, з тых людзей яму прыходзіць з усякага збожжа чацьвёртая доля ды па 12 талок (у) леце служаць.”

Пасьля Ліфляндзкае вайны 1558-82 гг. на гэтых землях паўстала кушліцкае староства, якое складалася з маёмасьці Кушлікі з навакольлем і фальваркамі. Валодалі ім ад таго часу князі Саламярэцкія, Нарушэвічы, Войны, Шчыты, Шпакоўскія, Яблонскія і Гільзэны. Урэшце на падставе прывілея Жыгімонта ІІІ ад 14 кастрычніка 1760 г. трымалі гэтае староства Язэп і Кацярына Корсакі, якія зь яго сплочвалі кварты (падатак з прыбытку на ахову дзяржаўных межаў) 223 злотых 18 грошай і гібэрны (падатак на вайсковыя патрэбы) – 42 злотых.

Паводле попісу полацкае шляхты ад 30 верасьня 1765 да складу харугвы дзісненскай парафіі ўваходзілі: Юры Корсак, судзьдзя земскі полацкі з Кушлікаў, ды Антон Жылінскі, Даніла Сталыгва, Ляневіч з арэндаваных імі ў Кушліках маёнткаў.

На пачатку ХХ ст. Кушлікі ўваходзілі ў склад Замшанскае воласьці Полацкага павету, землі належалі Якубоўскаму вясковаму таварыству, жыло ў вёсцы 93 чалавекі. Насельніцтва належала да Махіроўскага праваслаўнага прыходу.