Чамяры-1
Вёска Чамяры-1 знаходзіцца ў Рэчыцкім сельсавеце Камянецкага раёна, за 7 км на ўсход ад Камянца. Вядома з 16 ст., згадвалася як сяленне Чамяры Берасцейскага павета Трокскага ваяводства ВКЛ. У 1-й пал. 19 ст. вёска маёнтка Падбрадзяны, належала памешчыку Станіславу Букрабу, у Брэсцкім павеце Гродзенскай губерні Расійскай імперыі. Побач з вёскай уніяцкая царква (існавала ў 1814 г.). Паводле 8-й рэвізіі (1833) у вёсцы было 4 двары, 27 рэвізскіх душ. У 1857 г. казённае ўладанне, 150 рэвізскіх душ. Пасля 1861 г. сяло ў Камянец-Літоўскай воласці Брэсцкага павета. У 1871 г. пабудавана новая праваслаўная царква. У 1890 г. дзейнічала сельская грамада. Паводле перапісу 1897 г. ў вёсцы 44 двары, 309 жыхароў, хлебазапасны магазін. У 1905 г. - 375 жыхароў, прыхадская Дабравешчанская царква, дзейнічала народнае вучылішча.
Дабравешчанская царква на фотаздымку 1970-х гг.Год: каля 1970
У 1921-39 гг. Чамяры ў складзе Камянец-Літоўскай гміны Брэсцкага павета Палескага ваяводства Польшчы. У 1923 г. - 37 гаспадарак, 130 жыхароў (129 праваслаўных, 1 каталік). У 1940 г. ў вёсцы 58 двароў, 307 жыхароў, пачатковая школа. З 12.10.1940 г. ў Прускаўскім сельсавеце Камянецкага раёна Брэсцкай вобласці БССР. У Другую сусветную вайну загінула 8 мірных жыхароў вёскі, на франтах загінула 28 вяскоўцаў. З 16.7.1954 г. Чамяры-1 ў Рэчыцкім, з 1964 г. ў Камянецкім, з 19.5.1986 г. зноў у Рэчыцкім сельсаветах. Паводле перапісаў 1959 г. - 273, 1970 г. - 213, 2005 г. - 129 жыхароў. Старая царква ў Чамярах страчана ў 1970-я гг. , у 1996 г. пабудаваны новы Пакроўскі храм. У 2 км на ўсход знаходзіцца вёска Чамяры-2.
Літ.:
Гарады і вёскі Беларусі, Энцыклапедыя, Том 4
БРЭСЦКАЯ ВОБЛАСЦЬ, кніга ІI
Мінск, «БЕЛАРУСКАЯ ЭНЦЫКЛАПЕДЫЯ», 2007