Дабравешчанская царква ў Чамярах
Паводле даведніка "Гродненский православный календарь" за 1899 г. Дабравешчанская царква ў Чамярах-1 пабудавана на месцы ранейшага храма ў 1871 г. на сродкі прыхаджан і ўрада. Храм быў ўзведзены побач з сядзібай Тапалі, у 2 км на паўднёвы захад ад Чамяроў, ў 0,5 км ад Прускі Багуслаўскай. Са старой царквы прыхаджане ў 1872 г. пабудавалі капліцу Святога Іллі на вясковых могілках. На мяжы ХІХ і ХХ стст. прыход царквы налічваў 1543 чалавека з 7 вёсак: Чамяры 1, Беразнякі, Крыўляны, Падбрадзяны, Падрачаны, Пруска Багуслаўскага і Пруска Валгінава.
У старой царкве (яшчэ ўніяцкай, невядома калі і кім была ўзведзена, але існавала ўжо ў 1814 г.) знаходзіўся цудатворны абраза Святога Спаса, да якога збіраліся вернікі з усіх навакольных мясцін. Але, як пиша "Гродненский православный календарь", абраз быў вывезены з царквы дамініканцамі Бухавецкага кляштара. У 1825 г. адбыўся суд, які вырашыў, што дамініканцы павінны былі вярнуць абраз, але гэта не было здзейснена. На пачатку ХХ ст. абраз знаходзіўся ў кобрынскім касцёле. У чамярскай царкве знаходзілася копія гэтага цудатворнага абраза.
Царква была вырашана 4-часткавай падоўжна-восевай кампазіцыяй: прытвор, бабінец, малітоўная зала, 5-гранная апсіда. Вертыкальная дамінанта — 8-гранная шатровая званіца, узведзеная над папярочным прамавугольным у плане прытворам. Прытвор праз нізкі бабінец злучаны з высокім кубападобным зрубам малітоўнай залы, завершаны шатровым дахам з макаўкай. Галоўны ўваход адзначаны 2-слуповым ганкам пад 2-схільнай навіссю. Гарызантальна ашаляваныя сцены члянёны прамавугольнымі аконнымі праёмамі ў простых ліштвах.
Царква страчана ў 1970-я гады. У 1996 г. ў Чамярах-1, ужо ў самой вёсцы, пабудавана новая царква Покрыва Прасвятой Багародзіцы.