Маціевічы
Вёска ўпершыню згадваецца каля 1575 г. з назваю Маціевічы-Здзітавец (ці "Здзітаўцы ў Маціевічах"). У гэты год зямянін С. Бернатовіч перадаў маёнтак у заклад Я. Свідзерскаму. З дакумента робіцца зразумелым, што паселішча Маціевічы існуе ўжо колькі дзесяцігоддзяў, у 1580 г. пінскі харунжы В. Ф. Фядзюшка перакупіў у Я. Свідзерскага гэты маёнтак. Тады ж Т. М. Такарэўская прадала I. Д. Здзітавецкаму сваю частку Здзітаўца па абодва бакі Мухаўца з вёскай Маціевічы. У канцы XVI — сярэдзіне XVII ст. Маціевічы былі ў супольным валоданні розных шляхецкіх радзін: Фядзюшкаў (1589, 1621 гг.), Здзітавецкіх (1629, 1631, 1664 гг.), Задарноўскіх (1631 г.), Пшэўскіх, Нямцэвічаў, Пукштаў. У 1700 г. складзены інвентар на Здзітавец-Маціевічы (Плошчу). У XIX ст. вёска ўваходзіла ў маёнтак Плошча Трэмбіцкіх, складала асобнае сялянскае таварыства. Маціевіцкая царква заснавана Касцюшкамі ў 1-й чвэрці XVIII ст. (дарэнні ад іх з'яўляліся ў 1718, 1782 гг.). Царква значна перабудавана ў 1992 г.).
Царква Раства Іаана Прадцечы ў МаціевічахФота © К. Шастоўскі | Дата: 23/08/2004
У 1866 г. у Маціевічах жылі 172 чалавекі, у 1897 г. - 197, у 20-30-я гады XX ст. існавала польская школа; жылі 181 чалавек. 16.07.1954 г. утвораны Маціевіцкі сельсавет Жабінкаўскага раёна (у 1959—1961 гг. у межах Камянецкага раёна). 13.10.1961 г. замест Маціевіцкага ўтвораны Якаўчыцкі сельсавет. У 1970 г. — 57 двароў, 177 жыхароў. У 1999 г. - 106 сялянскіх гаспадарак, 399 жыхароў. У Маціевічах месцяцца базавая школа, клуб, аддзяленне сувязі, ветучастак, чыгуначны прыпынак. Ураджэнец Маціевіч - былы міністр сувязі Беларусі I. М. Грыцук (1932 г.).
Поле ў ваколіцах вёскі МаціевічыФота © К. Шастоўскі
А. Р. Бензярук
Памяць. Жабінкаўскі раён
Мінск, Ураджай, 1999
Апублікавана з ласкавай згоды аўтара Анатоля Бензярука