Мельнікі
Вёска Мельнікі знаходзіцца ў Воўчынскім сельсавеце Камянецкага раёна, за 56 км на захад ад Камянца. У сярэдзіне 19 ст. вёска ў Брэсцкім павеце Гродзенскай губерні. Паводле 8-й рэвізіі (1833) вёска ў складзе маёнтка Грымяча, 8 двароў, 59 рэвізскіх душ, вадзяны млын. У 1857 г. адносілася да маёнтка Ставы, уласнасць графіні Красінскай. У канцы 19 ст. ў Воўчынскай воласці Брэсцкага павета. Паводле перапісу 1897 г. ў вёсцы 14 двароў, 101 жыхар. На 1905 г. - 85 жыхароў.
Млын у МельнікахФота © Глеб Лабадзенка | Дата: 08/2013
У 1921-39 гг. у складзе Воўчынскай гміны Брэсцкага павета Палескага ваяводства Польшчы. Працаваў вадзяны млын, якім у 1930 г. валодалі Т. Чамброўскі і В. Рэмерз. У 1940 г. ў вёсцы 61 двор, 267 жыхароў. З 12.10.1940 г. ў Стаўскім сельсавеце Высокаўскага раёна Брэсцкай вобласці БССР. У час пасляваеннай калектывізацыі ў вёсцы быў арганізаваны калгас. З 16.7.1954 г. ў Воўчынскім сельсавеце. З 17.4.1962 г. ў Камянецкім раёне. Паводле перапісаў у вёсцы ў 1960 г. - 57, у 1970 г. — 41, у 2005 г. - 6 жыхароў. На паўночнай ускраіне вёскі Мельнікі на рэчцы Пульва захаваўся помнік прамысловай архітэктуры, пабудаваны на мяжы ХІХ і ХХ стст., - драўляны млын, знаходзіцца ў занядбаным стане.
Літ.:
Гарады і вёскі Беларусі, Энцыклапедыя, Том 4
БРЭСЦКАЯ ВОБЛАСЦЬ, кніга ІI
Мінск, «БЕЛАРУСКАЯ ЭНЦЫКЛАПЕДЫЯ», 2007