Ражанка - фота і помнікі

Гісторыя Ражанкі

Былое мястэчка Ражанка - цэнтр сельсавета ў Шчучынскім раёне, на аўтадарозе Масты—Шчучын. За 7 км на Пд ад Шчучына, 74 км ад Гродна, 4 км ад чыгуначнай станцыі Ражанка. 2,3 тыс. жыхароў, 795 двароў (1999 г.).

3 2-й паловы 16 ст. ў складзе Лідскага павета Віленскага ваяводства ВКЛ. У 17 — пачатку 18 ст. належала Сапегам. У 1674 г. пабудаваны Петрапаўлаўскі касцёл. 3 1795 г. у Расейскай імперыі. 3 1801 г. у Лідскім павеце Гродзенскай губерні. У 1804 г. існавала прыходскае вучылішча. У 1832 г. маёнтак Ражанка канфіскаваны за ўдзел яго гаспадара Л.Пацея ў паўстанні 1830—31 гг. 3 1843 г. у Лідскім павеце Віленскай губерні. У 2-й палове 19 ст. Ражанка — цэнтр воласці, у 1861 г. — 883 жыхароў. У 1866 г. Ражанка — мястэчка, меліся касцёл, царква, сукнавальная фабрыка; у 1885 г. — 604 жыхароў, 63 двары, валасное праўленне, 2 вадзяныя млыны, 3 корчмы; у 1897 г. — 777 жыхароў. У 1905 г. існавалі маёнтак Ражанка (45 жыхароў) і мястэчка Ражанка (504 жыхароў), за 2 вярсты ад старой — новая Ражанка (135 жыхароў). У 1907 пры будаўніцтве чыгункі Ліда—Масты—Ваўкавыск пабудавана чыгуначная станцыя Ражанка.

З сакавіка 1918 г. Ражанка ў складзе БНР. 3 1921 г. акупавана Польшчай, мястэчка Навагрудскага ваяводства. У 1933 г. у мястэчку 734 жыхароў, касцёл, царква, пошта. 3 1939 г. у БССР. 3 12.10.1939 г. - вёска, 965 жыхароў, цэнтр сельсавета ў Шчучынскім раёне Баранавіцкай вобласці, з 20.9.1944 г. у Гродзенскай вобласці.

У вёсцы базавая школа, школа-інтэрнат, дзіцячы сад, Дом культуры, бібліятэка, бальніца, амбулаторыя, аддзяленне сувязі, магазіны. Помнікі архітэктуры — Петрапаўлаўскі касцёл, капліца (19 ст.), за 2 км ад Ражанкі — сядзіба (2-я пал. 19 ст.). Брацкая магіла савецкіх вайскоўцаў, помнік землякам.

Крыніца:
Уладзімір Мальцаў
Энцыклапедыя гісторыі Беларусі. Т.5.
Мінск, "Беларуская Энцыклапедыя", 1999