Касцёл Святых апосталаў Пятра й Паўла | Ражанка

Больш фотаздымкаў (17) >>

Абвяшчаючы адмову ад абавязковага падабенства антычнасці, архітэктары-рамантыкі яшчэ ў першай трэці 19 ст. пакідаюць за сабой поўную творчую свабоду ў выбары мастацкіх форм. Гармонію, прыгажосць і веліч гатычнага мастацтва адкрывае для сябе найбольш таленавіты ў гэтым стылявым накірунку дойлід X. Марконі. Узведзены ім у "экзатычным стылі" ў 1827 г. Петра-Паўлаўскі касцёл у в. Ражанка можна лічыць адным з першых "гатычна" цэласных будынкаў на Беларусі. Работы ажыццяўляліся па заказу сенатара Каралеўства Польскага Л. Паца. Невялікі храм адлюстраваны на малюнку Н. Орды 1861—1877 гг. Перабудаваны ў 1924—1925 гг., капітальна адрамантаваны і адчынены ў 1990 г.

Кампактная пабудова кампазіцыі, ажурная пластыка фасадаў, гарманічная сувязь з ландшафтам характарызуюць касцёл як яркі помнік рэтраспектыўна-гатычнага стылю. Аднанефавы крыжападобны ў плане храм з больш нізкімі пяціграннай апсідай і крыламі трансепта. Тарцы высокіх двухсхільных дахаў над нефам і крыламі трансепта закрыты ступеньчатымі шчытамі. Да бакавых сцен асноўнага аб'ёму далучаны дзве прамавугольныя ў плане капліцы. Да паўднёва-заходняга вугла нефа асіметрычна прыбудавана трох'ярусная вежа (васьмярык на двух чацверыках), накрытая васьмігранным спічастым шатром, да нефа з паўночнага боку далучана невялікая сакрыстыя. Вуглы асноўнага аб'ёму ўмацаваны контрфорсамі і завершаны дэкаратыўнымі вежачкамі. Вокны высокія, стральчатыя, з узорыстымі вітражамі. У цэнтры галоўнага фасада круглае акно-ружа, вышэй — арнаментальны пояс і шчыт. Галоўны ўваход аформлены перспектыўным парталам, па баках якога стральчатыя нішы са скульптурамі святых Пятра і Паўла (не захаваліся). Аздобу фасада дапаўняюць вузкія плоскія нішы з трохлопасцевымі арачнымі завяршэннямі і ляпны герб. Маляўнічасць будынку надае спалучэнне цёмнага паліхромнага фона бутавай муроўкі і пабеленых элементаў дэкору: ліштваў, цяг, аркатур. Пластыку інтэр'ера ўзмацняюць спляценні ляпных гуртаў на цыліндрычным скляпенні нефа і крыжовых — крылаў трансепта.

Унутры дзве калоны падтрымліваюць хоры з арачнай балюстрадай. Сцены нефа расчлянёны пілястрамі і размаляваны ў верхняй частцы шматфігурнымі кампазіцыямі на біблейскія тэмы.

Крыніца:
А.М. Кулагін
Эклектыка
Мінск, Ураджай, 2000