Сцяпанкі - фота і помнікі

Гісторыя Сцяпанкаў

Упершыню ўзгадваецца 16.04.1589 г. як сяло, што належыла падстаросце берасцейскаму М. Райскаму, чашніку валынскаму Ф. Рудзецкаму і М. Яцынічу. Верагодна, у час заснавання — сярэдзіна XV ст. — належыла Непакойчыцкаму маёнтку, у сярэдзіне XVII ст. далучана да Сяхновічаў. 5.07.1656 г. Зофія Муралеўская з Касцюшкаў атрымала ад паноў Целяціцкіх правы на Сцяпанкі, у наступны год — уступіла вёску свайму пляменніку А. Я. Касцюшку. 16.01.1700 г. складаецца запавет А. Я. Касцюшкі, згодна з якім маёнтак пераходзіць да ягоных сыноў. 20.03.1711 г. Ю. Мажэйка-Каранёўскі перадаў грунты ў Сцяпанках Л. Трэмбіцкаму, потым, у 1714 г. П. Касцюшка ўступіў грунт сваяку А. К. Касцюшку, а затым ягонаму сыну Л. Т. Касцюшку (з 1729 г. — у валоданні Ф. Б. Касцюшкі). У 80-я гг. XVIII ст. вёска зноў далучылася да Каранёва.

Сцяпанкаўская царква ўпершыню згадваецца пад 1619 г. Адбудоўвалася ў XVIII—XIX ст. 26.04.1796 г. князь А. Чартарыйскі дараваў правы на Сцяпанкаўскі прыход айцу Іакіму Аляксандравічу. У 1902 г. прыбудавана званіца, у 1925 г. царква пакрыта бляхай (метрычныя кнігі захоўваліся з 1843 г.).

У пачатку XIX ст. Сцяпанкі падзелены між маёнткамі Папротна, Сяхновічы і Шпіталі Каранёўскіх і Нарбутаў. З 1862 г. адкрыта народнае вучылішча (у 1935 г. 182 навучэнцы). У вёсцы месцілася станавая кватэра Сяхновіцкай воласці, знаходзіўся цэнтр сялянскага таварыства і пасёлак К. Завяржэнца. У 1911 г. заснавана бібліятэка. Згодна з перапісам 1897 г., налічвалася 57 двароў з 432 жыхарамі. У 1935 г. жылі 395 чалавек. У 1959 г. утвораны Сцяпанкаўскі сельсавет Камянецкага раёна, у 1962 — 1965 гг. — у Кобрынскім, у 1965—1966 гг. — у Брэсцкім, з 30.07.1966 г. — у Жабінкаўскім раёнах. У 1998 г. у Сцяпанках 96 двароў, 271 жыхар, вёска з'яўляецца цэнтрам (з 1997 г.) сельскагаспадарчага калектыўнага прадпрыемства (былы калгас) "Усход", у ёй маюцца клуб, дзіцячы садок, аддзяленне сувязі.

А. Р. Бензярук
Памяць. Жабінкаўскі раён
Мінск, Ураджай, 1999
Апублікавана з ласкавай згоды аўтара Анатоля Бензярука