> Брэсцкая вобласць > Жабінкаўскі раён > вёска Сцяпанкі > Царква Святога Міхала Арханёла
Сцяпанкі. Царква Святога Міхала Арханёла
Сцяпанкі. Царква Святога Міхала Арханёла

Царква Святога Міхала Арханёла | Сцяпанкі

Выбраныя здымкі

Сцяпанкі. Царква Святога Міхала Арханёла

Агульны выгляд Фота © К. Шастоўскі |

Сцяпанкі. Царква Святога Міхала Арханёла

Галоўны фасад Фота © К. Шастоўскі |

Сцяпанкі. Царква Святога Міхала Арханёла

Агульны выгляд Фота © К. Шастоўскі |

Размешчана царква амаль у цэнтры вёскі, сярод жылой забудовы і сваім галоўным фасадам выходзіць на вясковую вуліцу. Зрублена яна з драўляных брусоў у 1780 г., але на працягу свайго існавання неаднаразова паднаўлялася. Да 1914 г. былі зроблены і некаторыя перабудовы, якія змянілі знешняе аблічча царквы. Так, на яе галоўным фасадзе была ўзведзена вежа-званіца, зменены завершы двух бакавых вежаў галоўнага фасада, а на вільчыку даху пасаджана двух'ярусная галоўка. Са слоў старых жыхароў вёскі (запіс 1970 г.) пры перабудове царквы прымаў удзел мясцовы цясляр Іван Ляўчук (памёр у 1943 г.). Такім чынам, пасля перабудовы ў архітэктуры храма спалучыліся асаблівасці драўлянага дойлідства канца XVIII ст. і эклектычныя матывы пачатку XX ст.

Міхайлаўская царква адносіцца да рэдкага на Беларусі тыпу драўлянага храма — так званага базілікавага тыпу. Храм складаецца з дзвюх частак: выцягнутага прамавугольніка, які завяршаецца трохсценнай апсідай (на поўначы), і вежаў са званіцамі, якія складаюць галоўны фасад (на поўдні). У інтэр'еры прастора храма чатырма калонкамі (па дзве ў кожным радзе) падзелена на тры нефы: цэнтральны і два бакавыя. Цэнтральны неф перакрыты цыліндрычнымі скляпеннямі, бакавыя маюць плоскую бэлечную столь. Калі разглядзець папярочны разрэз храма, то цэнтральны неф, накрыты двухсхільным дахам, выдзяляецца па вышыні над бакавымі.

Базілікавыя структуры яскрава прагледжваюцца ў аб'ёмна-прасторавай кампазіцыі Міхайлаўскай царквы. Цэнтральны неф, які вылучаецца па вышыні і выступае за межы бакавых, завяршаецца трохсценнай апсідай. Сцены бакавых нефаў прарэзаны высокімі аконнымі праёмамі. Вокны маюць дэкаратыўныя пераплёты, якія ствараюць геаметрычны малюнак. Паміж пераплётаў — каляровае шкло, накшталт вітражоў. Бакавыя сцены цэнтральнага нефа (над дахам) прарэзаны трыма маленькімі прамавугольнымі вокнамі (на кожнай сцяне), якія дадаткова асвятляюць інтэр'ер.

Бакавыя нефы на галоўным фасадзе з'яўляюцца асновай для дзвюх чацверыковых вежаў, якія завершаны даволі масіўнымі цыбулістымі галоўкамі. Над гэтымі галоўкамі ўзвышаюцца макаўкі, пасаджаныя на высокіх васьмігранных шыйках. Цэнтральны неф на галоўным фасадзе з'яўляецца асновай двух'яруснай вежы-званіцы. Аснова вежы з'яўляецца прытворам. Ніжні ярус глухі, дэкараваны трыма невысокімі аб'ёмамі з двухсхільнымі дахамі і трохвугольнымі франтонамі. Край верхняга яруса прарэзаны высокімі і маленькімі (чаргуюцца праз адну грань) праёмамі, завершаны ярус невысокім шатром з цыбулістай макаўкай. Кожная грань шатра ў аснове дэкаравана трохвугольным франтонам, што нагадвае форму старажытнарускага "какошніка".

У інтэр'еры царквы Архангела Міхаіла захаваўся цудоўны твор манументальнага жывапісу і дэкаратыўна-прыкладнога мастацтва — трох'ярусны драўляны разны іканастас, выкананы ў канцы XVIII ст. у стылі барока. Іканастас, які аддзяляе алтарную частку храма ад асноўнай залы, з'яўляецца галоўным элементам у інтэр'еры праваслаўнага храма. Цэнтрам кампазіцыі іканастаса з'яуляюцца царскія вароты (уваход у алтарную частку храма), якія вылучаюцца цудоўнай ажурнай разьбой і з'яўляюцца выдатным творам дэкаратыўна-прыкладнога мастацтва.

Крыніца:
Т.І. Чарняўская
Памяць, Жабінкаўскі раён.
Мінск, Ураджай, 1999

Год пабудовы (перабудовы): 1780, > 1900
Каардынаты:
52° 16'12.17"N, 23° 59'40.02"E

Фотагалерэі