Шпіталі - фота і помнікі

Гісторыя Шпіталёў

Узнікла не пазней за 2-ю палову XVII ст., калі на сродкі ордэна цыстарцыянцаў з Алізарава Става на месцы будучага паселішча быў адкрыты шпіталь. Першымі ўладарамі маёнтка былі Пацеі. 24.06.1730 г. яны прадалі сваю ўласнасць Янушкевічам. Амаль сто гадоў (да 1850 г.) Шпіталі ўваходзілі ў Рэчыцкі ключ князёў Чартарыйскіх. У 1816 г. у маёнтку было 179 душ мужчынскага полу. У маёнтак уваходзілі вёскі Канатопы, Лойкі і Сцяпанкі. На ягоных землях утварылася (1861 г.) Сцяпанкаўскае сялянскае таварыства Сяхновіцкай воласці, побач знаходзіліся аднайменныя маёнткі Валіцкіх і Булгакаў (так званыя Шпіталі-Жулкаўшчызна). У 1897 г. меліся вёска, хутар, 2 рабочыя дамы. Агульна насельніцтва было 99 чалавек. У снежні 1939 г. шпіталёўцы першымі ў Брэсцкай вобласці арганізавалі калгас. У 1970 г. у вёсцы налічвалася 74 жыхары, у 1998 г. — 120.

А. Р. Бензярук
Памяць. Жабінкаўскі раён
Мінск, Ураджай, 1999
Апублікавана з ласкавай згоды аўтара Анатоля Бензярука