Вёска Войская
Вёска Войская, цэнтр Войскага сельсавета Камянецкага раёна, знаходзіцца за 13 км на захад ад Камянца, 52 км ад Брэста. Паводле пісьмовых крыніц вядома з канца 16 ст. як двор у Берасцейскім павеце ВКЛ, шляхецкая ўласнасць. У 1773 гг. па фундацыі ўладальнікаў маёнтка Бухавецкіх пабудавана драўляная ўніяцкая Свята-Троіцкая царква.
Царква Святой Тройцы ў ВойскайФота © Кузіч Мікола | Дата: 02/12/2006
Пасля 3-га падзелу Рэчы Паспалітай Войская ў Расійскай імперыі. У 1-й пал. 19 ст. маёнтак і аднайменная вёска, уласнасць Бухавецкіх, у Брэсцкім павеце Гродзенскай губерні. Паводле 8-й рэвізіі (1833) у вёсцы 2 двары, 18 наяўных сялянскіх душ. Паводле інвентара 1845 г., маёнтак знаходзіўся ў закладзе ў двараніна Міхаіла Радзевіча. У склад маёнтка ўваходзілі вёскі Войская і Пераходы. З 1850-х г. сяло, цэнтр Войскай воласці Брэсцкага павета. У 1857 г. вёска ў дзяржаўнай уласнасці, налічвалася 48 рэвізскіх душ. У 1885 г. ў сяле 13 двароў, 152 жыхары, дзейнічалі валасное праўленне, школа, карчма. За 4 вярсты ў Лісоўчыцах працаваў цагельны завод. У 1890 г. маёнтак належаў Войцэху Багуслаўскаму. Паводле перапісу 1897 г. ў сяле 18 двароў, 143 жыхары, царква, народнае вучылішча, валасное праўленне, хлебазапасны магазін, 2 ветраныя млыны, кузня, карчма. У 1905 г. 197 жыхароў; у народным вучылішчы 62 вучні.
У 1921—39 гг. Войская ў складзе Польшчы. У 1923 г. 41 двор, 258 жыхароў, цэнтр гміны Брэсцкага павета Палескага ваяводства, з 23.3.1928 г. ў Ратайчыцкай гміне Брэсцкага павета. У вёсцы 2 ветраныя млыны, якія належылі Т. Малюховічу і Г. Туру. У 1926—27 гг. дзейнічаў гурток Беларускай сялянска-рабочай грамады. У 1940 г. 52 двары, 348 жыхароў, пачатковая школа, хата-чытальня. З 12.10.1940 г. — цэнтр сельсавета ў Камянецкім раёне Брэсцкай вобласці БССР. У Другую сусветную вайну на франтах загінулі 8 вяскоўцаў. У 1948 г. ў 7-гадовай школе 74 вучні. У 1949 г. арганізаваны калгас імя Чапаева. З 16.7.1954 г. ў складзе Агародніцкага сельсавета, з 14.4.1964 г. зноў цэнтр сельсавета. Паводле перапісаў у 1960 г. - 238, у 1970 г. - 247, 2005 г. - 941 жыхар. У вёсцы захваўся помнік народнай архітэктуры - драўляная царква Святой Троіцы.
Крыніца:
Гарады і вёскі Беларусі, Энцыклапедыя, Том 4
БРЭСЦКАЯ ВОБЛАСЦЬ, кніга ІI
Мінск, «БЕЛАРУСКАЯ ЭНЦЫКЛАПЕДЫЯ», 2007