Царква Святой Тройцы | Войская

Свята-Троіцкая царква ў Войскай

Каля 1773 г. ў вёсцы Войская па фундацыі Бухавецкіх, ўладальнікаў маёнтка Войская, святаром Лукой Куніцкім і прыхаджанамі была пабудавана драўляная ўніяцкая царква Святой Тройцы. На мяжы ХІХ і ХХ стст. прыхаджан налічвалася 1798 чалавек з 7 вёсак: Войская, Задвараны, Лісоўчыцы, Лускалы, Перкавічы, Пераход, Русілы. У Лісоўчыцах захаваліся рэшткі прыпісной царквы Іаана-Прадцечы.

Царква Святой Тройцы ў ВойскайФота © Кузіч Мікола | Дата: 02/12/2006

Царква ў Войскай — помнік народнага дойлідства з рысамі стылю барока. Вырашана прамавугольным працяглым зрубам, што пераходзіць у 3-гранную апсіду, 2-схільны гонтавы дах над якой пераходзіць у вальмавы вільчык даху. Па цэнтры дах быў завершаны гранёнай барочнай яруснай вежачкай. Але, нажаль, каля 2012 г. мясцовы святар змяніў яе на маскоўскую цыбуліну, чым парушыў не толькі барочны характар былой уніяцкай царквы, але і заканадаўства па ахове помнікаў архітэктуры і культуры Беларусі.

У 2010-я на царкву замест барочнай галоўкі ўсталявалі цыбулінуФота © Аляксандр Строкач | Дата: 20.04.2012

Па баках царквы да апсіды далучаюцца рызніцы, да галоўнага фасада — прамавугольны прытвор. Вертыкальна ашаляваныя сцены прарэзаны аконнымі праёмамі і ўмацаваны брусамі-сцяжкамі ў прасценках.

ФрагментФота © Аляксандр Строкач | Дата: 20/04/2012

Унутры бакавыя рызніцы адкрываюцца ў апсіду балконамі, над бабінцам размешчаны хоры. Апсіда вылучана драўляным бела-пазалочаным іканастасам, створаным пасля пераасвячэння царквы ў праваслаўе у 1830-я гг. Высокамастацкай драўлянай разьбой выкананы царскія вароты — ажурная вязь вінаграднай лазы з 6 круглымі абразамі-таблеткамі. Апсіда асвятляецца 2 фігурнымі аконнымі праёмамі.

Брама-званіца, ХІХ ст.Фота © Кузіч Мікола | Дата: 02/12/2006

Перад царквой ў ХІХ ст. пастаўлена 2-ярусная брама-званіца, ніжні шырокі 3-арачны ярус якой выкладзены з цэглы і праз шырокі, раней гонтавы, а цяпер бляшаны, адліў пераходзіць у 6-гранны драўляны барабан з шатровым верхам і цыбулінай у завяршэнні.

Літ.:
1. А.М. Кулагін
Праваслаўныя храмы на Беларусі
Мінск, Беларуская Энцыклапедыя, 2001
2. Гродненский православный календарь
Православие в Брестско-Гродненской земле в конце ХІХ века, Том 1
Воронеж, 1899