Кляштар бэрнардынаў | Нясвіж

Больш фотаздымкаў (5) >>

Ад былога нясвіжскага кляштару бернардзінцаў да нашых дзён дайшоў толькі мураваны жылы корпус (па сучаснай вул. Ленінскай). Кляштарны комплекс закладзены ў 1598 г., будаўніцтва завершана ў пачатку 17 ст. Будынкі займалі тэрыторыю на паўночна-заходняй частцы абарончага вала Нясвіжу і мелі на той час абарончае значэнне. Галоўным фасадам касцёл выходзіў на галоўную вуліцу горада.

Комплекс уключаў касцёл і П-падобны ў плане жылы корпус, які прылягаў да бакавога фасада касцёла. Яны ўтваралі замкнёны ўнутраны дворык. У 1793 г. касцёл згарэў. Адноўлены ў 1802—22 гг. У 19 ст. храм перабудоўваўся. У 1864 г. закрыты. Жылы корпус перададзены ваеннаму ведамству, а касцёл перароблены на праваслаўную царкву (не захавалася).

Жылы корпус двухпавярховы, ад асноўнай прамавугольнай часткі адыходзяць тры асіметрычныя бакавыя крылы, накрытыя двухсхільнымі дахамі. Сцены фасадаў рытмічна прарэзаны невысокімі прамавугольнымі аконнымі праёмамі, на паўночным фасадзе паміж вокнамі — лапаткі. Унутраная планіроўка калідорнага тыпу. Кляштарны будынак мае рысы барока, вылучаецца манументальнасцю і строгасцю архітэктурных форм.

Літ.:
Т.І. Чарняўская
Памяць. Нясвіжскі раён
Мінск, Белта, 2002