Царква Богаяўленская | Жыровіцы

Больш фотаздымкаў (5) >>

Богаяўленская царква Успенскага манастыра ў Жыровіцах

Гісторыя будаўніцтва Яўленскай і Крыжаўзвіжанскай цэркваў жыровіцкага Успенскага манастыра даволі заблытаная і міфалагізаваная. Дата ўзвядзення Яўленскай царквы вар'іруецца рознымі даследчыкамі ад 1672 г. да канца XVIII ст. Аднак мастацтвазнаўчы аналіз прыводзіць да высновы, што абодва помнікі ствараліся адначасова каля 1769 г. у перыяд росквіту віленскага барока, калі манастыр у Жыровічах быў уніяцкім. Царква ўзведзена з камення ў цэнтры манастыра на месцы з сакральнай містычнай адзнакай — тут на камені паўторна з'явіўся славуты абраз Маці Божай Жыровіцкай.

Яўленская і Крыжаўзвіжанская цэрквы крыху ссунуты падоўжнымі восямі адносна адзін аднаго, што стварае разгорнутасць ансамбля і паслядоўнасць яго ўспрымання ў прасторы і часе. Прынамсі гэтая глыбінна-прасторавая кампазіцыя разам з вырашэннем галоўных фасадаў храмаў у выглядзе шматпланавых тэатралізаваных куліс раскрывае глыбокую семантычную ідэю ансамбля і надае яму мастацкую выразнасць.

Прамавугольная ў плане Богаяўенская царква накрыта двухсхільным дахам з драўляным барабанам і купалам у сярэдняй частцы. Галоўны фасад як самастойны шчыт, што выходзіць за межы асноўнага аб'ёму, мае пануючае значэнне. Уражанне вертыкальнай накіраванасці ствараецца пучкамі паўкалонак, разным фігурным франтонам на галоўным фасадзе, пластычнасцю бакавых валют. Астатнія фасады сціпла апрацаваны лапаткамі, простымі карнізамі і абрамленнямі вокнаў. Хоры, размешчаныя ў заходняй частцы адназальнага інтэр'ера, абмежаваны ўвагнута-пукатым парапетам, крапаваным пілястрамі і профілямі.