Касцёл Унебаўзяцця Найсвяцейшай Панны Марыі | Новы Двор

Больш фотаздымкаў (17) >>

Пабудаваны ў 1749 г. у паўночна-заходняй частцы вёскі з дрэва на месцы храма 1670 г. Адноўлены ў 1880 г. За агароджай касцёла ў 1852 г. пабудавана квадратная ў плане 2-ярусная званіца пад 4-схільным дахам.

Помнік драўлянага дойлідства. Складаецца з прамавугольнага ў плане асноўнага аб'ёму, завершанага 8-граннай вежай (надбудавана ў 1880 г.), і 5-граннай апсіды з сакрысціямі. Асноўны аб'ём і апсіда накрыты агульным 2-схільным дахам з вальмамі. Сакрысціі маюць самастойныя вальмавыя дахі. Сцены прарэзаны лучковымі і прамавугольнымі аконнымі праёмамі і вертыкальна ашаляваны дошкамі з нашчыльнікамі. Франтон галоўнага фасада аддзелены ад плоскасці карнізам, гарызантальна ашаляваны.

У інтэр'еры асноўнае памяшканне выцягнута па падоўжнай восі. Плоскую столь падтрымліваюць 6 слупоў, звязаных бэлькамі ў 2 падоўжныя рады. Тры разныя алтары выкананы ў стылі ракако. Невысокі дэкарыраваны пазалочанымі медальёнамі цокаль галоўнага алтара падтрымлівае асноўны ярус, расчлянёны 4 калонамі карынфскага ордэра. У цэнтры абраз «Узнясенне», па баках драўляныя скульптуры святых Апосталаў Пятра і Паўла (канец 18 ст.). Наверша, аддзеленае ад асноўнага яруса крапаваным карнізам, аздоблена выявамі галовак херувімаў, кароны, ваз, картушаў; пасярэдзіне — абраз «Каранаванне Маці Божай». У дэкоры шырока выкарыстана скразная пазалочаная разьба па дрэве, у арнаментыцы якой валюты, ракайлі, лісце аканта. Бакавыя алтары падобны галоўнаму. Арган на хорах дэкарыраваны 2 драўлянымі скульптурамі анёлаў, 2 херувімаў і накладной залачонай разьбой у стылі ракако.

Крыніца:
А.М. Кулагін
Каталіцкія храмы на Беларусі
Мінск, Беларуская Энцыклапедыя, 2000