> Магілёўская вобласць > Магілёўскі раён > горад Магілёў > Ратуша
Магілёў. Ратуша
Магілёў. Ратуша

Ратуша | Магілёў

Выбраныя здымкі

Магілёў. Ратуша

Погляд на адбудаваную ратушу, 07.2008 Фота © oldmah |

Магілёў. Ратуша

Адбудаваная наноў магілёўская ратуша Фота © oldmah |

Магілёў. Ратуша

Ратуша на малюнку XIX ст. Фота © oldmah |

Магілёўская ратуша існавала ў 17—20 ст. на цэнтральнай плошчы Магілёва — Гандлёвай (з 19 ст. Губернатарская, сучасная Савецкая). У канцы 17 ст. ратуша — мураваны 2-павярховы будынак з 8-граннай 5-яруснай вежай пасярэдзіне галоўнага фасада. У 1679—81 пад кіраўніцтвам майстра Феські збудаваны прамавугольны ў плане (28x10,5 м) будынак ратушы. Першая вежа вышынёю каля 26 м, узведзеная ў 1682—86 майстрам Крузбергам з Быхава, абвалілася. У чэрвені 1692 пасля разборкі муроў 1-й вежы майстрам Ігнатам з арцеллю збудавана новая вежа вышынёю да 38 м. Разам са званіцай Богаяўленскага сабора ратушная вежа была асноўнай вертыкальнай дамінантай горада.

Як сведчаць гістарычныя і археалагічныя матэрыялы, у ратушы знаходзіліся: на 1-м паверсе сені, вялікая «ізба» (адбываліся суды пад кіраўніцтвам войта), канцылярыя і «ратушная святліца», дзе захоўваліся бягучыя справы магістрата; на 2-м паверсе — сені, судовая «ізба» (магістрацкія суды), вялікая зала (пасяджэнні магістрата) і дапаможныя памяшканні; у цокальным паўпадвальным паверсе — скарбніца, склады і астрог. Памяшканні ацяпляліся кафлянымі печамі, аздобленымі тэракотавай і зялёнай паліванай кафляй.

Верагодна, 1-ы паверх быў перакрыты скляпеннямі. На 2-і паверх вялі лесвіцы, аздобленыя разнымі драўлянымі балясамі. Вокны з невялікімі круглаватымі шыбамі мелі прыгожыя алавяныя рамы-аканіцы. Падлога зроблена са спецыяльнай цэглы, сцены пабеленыя. Звонку ратуша была атынкаваная, былі 2 ганкі — нізкі і высокі парадны (з боку галоўнага і дваровага фасадаў). Вежа 5-ярусная, завяршалася гранёным купалам са шпілем, мела балкон з металічнымі кратамі, вялікі гадзіннік (усталяваны на вежы ў 17 ст.). Стромкі дах ратушы накрыты плоскай чырвонай дахоўкай, аздоблены пазалочанымі флюгерамі-ветранікамі на франтоне, на дахах ганкаў і на вежавым шпілі.

У 1773 ратуша капітальна перабудавана, дах накрыты бляхай. Архітэктура яе фасадаў стала адпавядаць узведзеным побач на плошчы ў стылі класіцызму дамам губернатара і віцэ-губернатара: шырокі гарызантальны пояс, які падзяляў паверхі будынкаў, рустоўка ніжняга паверха, ліштвы акон 2-га паверха. У такім выглядзе ратуша захавалася да Другой сусветнай вайны, у час якой была пашкоджана; у 1957 знесена.

На месцы, дзе стаяла ратуша, праведзены археалагічныя раскопкі. У 1979 А.А.Трусавым выяўлены падмуркі (глыбіня 30— 70 см) і рэшткі сцен (шырыня 105—115 см), зробленыя з тонкай (5—5,6 см) цэглы-пальчаткі ў тэхніцы муроўкі (рад рубаў, рад старчакоў). Падмуркі складзены з вялікіх камянёў, прамежкі закладзены цэглай на вапнавай рошчыне. Каля галоўнага фасада выяўлены рэшткі цаглянага ганка. Знойдзены таксама кафлі з раслінным і геаметрычным арнаментам, паліваныя куфлі з выявай старажытнага герба Магілёва і вялікая колькасць вырабаў са шкла 16—19 ст. У 1984 І.М.Чарняўскім раскапаны рэшткі параднага ганка ратушы. Паводле архіўных і археалагічных матэрыялаў створаны праект адбудовы ратушы. Адбудавана ў 2007-08 гг.

Крыніца:
Алег Трусаў
Энцыклапедыя гісторыі Беларусі. Т.6-2.
Мінск, "Беларуская Энцыклапедыя", 2004


Год пабудовы (перабудовы): 1679-1681 (1), 2007-2008 (2)
Каардынаты:
53° 53'39.84"N, 30° 19'54.15"E

Фотагалерэі