Царква Святога Міхала Арханёла | Слуцк

Больш фотаздымкаў (14) >>

Свята-Міхайлаўскі сабор у Слуцку

Царква святога Міхаіла ў Слуцку пабудавана ў традыцыях народнага дойлідства з элементамі стыляў барока і позняга класіцызму. Напачатку існавала як Канстанцінаўская царква ў Старым горадзе, у канцы 18 ст. перанесена ў прадмесце Востраў і пабудавана на месцы разабранай у 1795 г. Міхайлаўскай царквы.

Спачатку была 2-зрубная, складалася з асноўнага аб’ёму і алтарнай апсіды, у канцы 19 ст. з захаду да асноўнага аб’ёму прыбудавана вежа-званіца. Царква яруснай кампазіцыі, складаецца з прамавугольнага ў плане 3-светлавога асноўнага аб’ёму, алтарнай апсіды і званіцы. Асноўны аб’ём і апсіда апяразаны па перыметры 2 глухімі прамавугольнымі ў плане галерэямі. Асноўны аб’ём завершаны васьмерыком на чацверыку на заломах і ветразях, над апсідай чацверыковы верх. Над вярхамі складанай формы купалы, над якімі ўзвышаюцца цыбулепадобныя купалкі на глухіх васьмерыках.

3-ярусная вежа-званіца (2 ніжнія ярусы чацверыковыя, верхні – чацвярык са зрэзанымі вугламі) завершана шлемападобным купалам і шпілем на нізкім чацверыку са зрэзанымі вугламі. Царква звонку гарызантальна ашалявана, вокны арачныя, прамавугольныя і круглыя (у званіцы). Ярусы падзелены прычолкамі, ніжні ярус званіцы на 3 фасадах завяршаюць 3-вугольныя франтоны, вуглы аздоблены лапаткамі. Асноўны аб’ём раскрыты ў галерэю трыма шырокімі праёмамі і аддзелены ад апсіды разным іканастасам. Царква дзейнічае. Помнік рэспубліканскага значэння.

Крыніца:
Ю.А. Якімовіч. З кн.: Архітэктура Беларусі: Энцыкл. давед. / Беларус. Энцыкл.; Рэдкал.: А.А. Воінаў і інш. – Мінск: БелЭн, 1993. - С. 449