Касцёл Святога Юр'я і Божай Маці | Пяршаі

Больш фотаздымкаў (14) >>

Касцёл пабудаваны на цэнтральнай плошчы ў 1933 г. з цэглы намаганнямі графа В.Тышкевіча і ксяндза Петраша, асвячоны 19.11.1933 г. біскупам Казімірам Букрабам. Пазней закрыты. У 1990-я гг. адноўлены. Дзейнічае.

Помнік стылізатарскай архітэктуры. Прамавугольны ў плане 3-нефавы аб'ём накрыты 2-схільным дахам; алтарная частка паўцыркульная з бакавымі сакрысціямі. На галоўным фасадзе шырокі рызаліт з 2-гранным шчытом, фланкіраваным надбудаванымі ў апошні час з сілікатнай цэглы 2 бакавымі васьмерыковымі шатровымі вежамі-званіцамі. У цэнтры верхняга яруса рызаліта шырокая арачная ніша, якая аб'ядноўвае 3-арачныя аконныя праёмы; пад імі 3-арачная 2-пілонная лоджыя галоўнага ўвахода. Сцены абапал рызаліта завершаны прамавугольнымі атыкамі з зубчастымі фрызамі. Астатнія фасады вырашаны плоскасна, рытмічна расчлянёны пілястрамі, прамавугольнымі аконнымі праёмамі, апяразаны карнізам і цягай простага профілю. Зала храма перакрыта плоскай столлю, апсіда — конхай з люнетамі.

Крыніца:
А.М. Кулагін
Каталіцкія храмы на Беларусі
Мінск, Беларуская Энцыклапедыя, 2000