Сядзіба | Дубенец

Сядзіба Кяневічаў у Дубянцы

Старадаўняя сядзіба Шчытоў-Неміровічаў гербу «Ястрабец». Размяшчалася на захад ад вёскі Дубенец. У XVIII ст. маёнтак Дубенец перайшоў да Алешаў. У сярэдзіне XIX ст. і да 1939 г. маёнтак належаў роду Кяневічаў.

Аднапавярховы мураваны дворак у Дубянцы быў пабудаваны на мяжы XVIII—XIX ст. Будынак у плане меў форму прамавугольніка, высокі падмурак, практычна аднолькавыя фасады. З аднаго і другога бакоў фасада выступалі шырокія ганкі на дзвюх парах масіўных мураваных калон, на якія абапіраліся нізкія трохвугольныя шчыты. Галоўны порцік з боку цэнтральнага ўвахода быў трохі шырэйшы і вышэйшы. Палац накрываў гладкі чатырохсхільны дах.

Найбольш каштоўныя прадметы інтэр'еру і творы мастацтва былі вывезены немцамі ў час Першай сусветнай вайны. Пасля 2-й сусветнай вайны на тэрыторыі сядзібы размяшчалася жывёлагадоўчая ферма. Сядзібны дом знішчаны ў 1960-я, засталіся яго падмуркі. Да сённяшняга часу захаваліся рэшткі ўязной каштанавай алеі і адзіны экзэмпляр дуба-волата.