Царква Святога Мікалая | Іказнь

Больш фотаздымкаў (12) >>

У цэнтры вёскі. Пабудавана ў 1905 г. з цэглы на месцы папярэдняга храма, які ўпамінаецца ў 1881 г.

Помнік архітэктуры рэтраспектыўна-рускага стылю. 3-часткавая аб'ёмна-прасторавая кампазіцыя храма складаецца з прытвора-званіцы, малітоўнай залы і 5-граннай апсіды. Асноўны кубападобны аб'ём мае нізкі квадратны ў плане ярус, 4-схільны пакаты дах якога завершаны цыбулепадобнай галоўкай на 8-гранным барабане. Надбудаваная над прытворам 2-ярусная (васьмярык на чацверыку) званіца завершана шатром з макаўкай. Арачны ўваходны праём аформлены 2-гранным парталам на калонках. Архітэктурны дэкор уключае аркатурныя паясы, пластычныя ліштвы арачных аконных праёмаў, вуглавыя калонкі, прафіляваныя карнізы на сухарыках.

Крыніца:
А.М. Кулагін
Праваслаўныя храмы на Беларусі
Мінск, Беларуская Энцыклапедыя, 2001