Царква Святой Тройцы | Дуброўна

Царква пабудавана на пачатку 19 ст. з цэглы ва ўсходняй частцы горада. Аднакупальны храм падоўжна-восевай кампазіцыі. Уключае галоўны аб’ём, апсіду і бабінец са званіцай на галоўным (паўднёва-заходнім) фасадзе. Галоўны аб’ём складаецца з двух частак: ніжняга чацьверыка і верхняга круглага сьветлавога барабана, які трымаецца на арках, перакінутых паміж сьценамі ніжняга яруса і чатырма унутранымі слупамі. Сьветлавы барабан перакрывае высокі купал. Двух’ярусная званіца завершана шатровым дахам. Ніжні яе ярус глухі, верхні прарэзаны высокімі арачнымі праёмамі. Зьнешняе дэкаратыўнае афармленьне мае рысы класіцызму. Галоўны ўваход і бакавыя сьцены асноўнага аб’ёму падкрэсьлены франтонамі. Аконныя праёмы завершаны сандрыкамі. Пілястры руставаныя. У інтэр’еры вылучаецца ўвенчаны купалам цэнтральны двух’ярусны аб’ём, зь якім непасрэдна злучаюцца бабінец і алтар.

Царква – помнік архітэктуры, у якім ярка выявіўся сінтэз традыцыйных прыёмаў мясцовага дойлідства і рыс класіцызму.

Крыніца:
Ю.А. Якімовіч
Збор помнікаў гісторыі і культуры Беларусі. Віцебская вобласць
Мінск, Беларуская Энцыклапедыя, 1987