Касцёл Беззаганнага Зачацця Найсвяцейшай Панны Марыі і кляштар францысканаў | Удзела

Больш фотаздымкаў (47) >>

Пабудаваны ў 1761 г. з цэглы ў цэнтры вёскі на месцы драўлянага касцёла 1643 г. пры кляштары францысканцаў, фундаванага ваяводай мсціслаўскім Юзафам Корсакам і ягонай жонкай Марыянай з Швайкоўскіх. Комплекс уключаў касцёл, кляштарны комплекс, гаспадарчыя пабудовы, цагляную агароджу з брамай-званіцай. Узорам для стварэння касцёла з'яўляўся касцёл у Беразвеччы. У 1837 г. галоўны фасад увянчаны трохвугольным франтонам і пазбаўлены бакавых вежаў. У гэты ж час выканана афармленне інтэр'ера ў стылі класіцызму.

Касцёл трохнефавы, з паўцыркульнай апсідай і сакрысціямі па баках. Нефы маюць аднолькавую вышыню і накрыты агульным двухсхільным дахам. Плоскасць галоўнага фасада расчлянёна пілястрамі, гарызантальнымі цягамі, філёнгамі і паўцыркульнымі авальнымі нішамі. Бакавыя і алтарны фасады раскрапаваны лапаткамі і прарэзаны фігурнымі аконнымі праёмамі.

У інтэр'еы цыліндрычныя скляпенні з падпружнымі аркамі і распалубкамі. Над прытворам размешчаны выгнутыя ў плане хоры, на якіх быў 12-галосны арган. Сцены і слупы дэкараваны шырокімі карнізнымі паясамі, іанічнымі канелюраванымі пілястрамі. Перад галоўным фасадам касцёла па восі цэнтральнага ўвахода ў 2-й палове 19 ст. пабудавана з цэглы квадратная ў плане двух'ярусная брама-званіца, вырашаная ў формах класіцызму.

У 1910 г. парафія налічвала 2978 вернікаў. У 1949 г. камуністы закрылі касцёл. Толькі ў 1988 г. ўтварыўся касцёльны камітэт. Ён вярнуў будынак храмам і адрамантаваў яго пад кіраўніцтвам кс. Ю. Булькі.

Крыніца:
Іосіф Зямчонак
Ваколіцы Парыжа. Старонкі гісторыі Пастаўскага Паазер'я
Паставы, "Сумежжа", 2004
А.М. Кулагін
Каталіцкія храмы на Беларусі
Мінск, Беларуская Энцыклапедыя, 2000