> Віцебская вобласць > Глыбоцкі раён > вёска Задарожжа > Касцёл Найсвяцейшай Панны Марыі
Задарожжа. Касцёл Найсвяцейшай Панны Марыі
Задарожжа. Касцёл Найсвяцейшай Панны Марыі

Касцёл Найсвяцейшай Панны Марыі | Задарожжа

Год пабудовы (перабудовы): 1910
Каардынаты:
55° 15'51.80"N, 27° 57'2.87"E

Фотагалерэі

Выбраныя здымкі

Задарожжа. Касцёл Найсвяцейшай Панны Марыі

Агульны выгляд Фота © Ціжоўка Алег (bystar) |

Задарожжа. Касцёл Найсвяцейшай Панны Марыі

Галоўны фасад Фота © Ціжоўка Алег (bystar) |

Задарожжа. Касцёл Найсвяцейшай Панны Марыі

Кс. Антоні Валентыновіч. Ягонымі намаганьнямі быў пабудаваны новы касьцёл у Задарожжы Фота © Jarosław Nowicki |

У Задарожжа прыязджае сёння шмат тых, хто цікавіцца беларускай гісторыяй, перадусім, – моладзь. Тут некалі стаяў старажытны драўляны касцёл, у якім хрышчоны Вацлаў Ластоўскі, гісторык, фундаменталіст беларускага адраджэння пачатка ХХ ст., прэм’ер-міністр Беларускай Народнай Рэспублікі.

Вацлаў Ластоўскі нарадзіўся 8 лістапада па новаму стылю 1883 года ў недалёкім засьценку Калеснікаў. Хрысцілі яго ўжо па Калядах, 26 снежня ў Задарожскім касцёле. Тамтэйшы святар ксёндз Антон Аўдыцкі даў яму адно імя: Вацлаў. У хроснай метрыцы бацькі немаўляці названы мяшчанамі, гэта значыць, відаць, паходзілі з беззямельнай шляхты, продкі якой не здолелелі ў першай палове ХІХ ст. давесці сваё шляхецтва адпаведнымі граматамі-прывілеямі.

Касцёл той, на жаль, згарэў у 1902 годзе. Пасля гэтага былі прыняты намаганні адбудаваць яго ў камені. У той час была выдадзена паштоўка з відарысам Задарожскага касцёла з заклікам да вернікаў ахвяроўваць сродкі на яго будаўніцтва. На ёй, у прыватнасці, напісана:
“У Задарожжы на папялішчах касцёла, які згарэў у Вялікасуботнюю ноч 1902 года, з ахвяраў людзей добрай волі ўзвышаецца новы мураваны касцёл Маці Боскай Ласкавай.
У сувязі з тым, што 5000-ай парафіі, якую да галечы давёў шматгадовы неўраджай, у будаўніцтве можа дапамагчы толькі ўласная праца. Звяртаемся да чулых сэрцаў хрысціянскіх аб братняй, хаця якой, сціплай дапамозе.
Пробашч Задарожскі кс. А. Валентыновіч,
губерня Віленская, павет Дзісненскі, паштовая станцыя Пліса.”


Заклік быў пачуты, і на ахвяраванні “людзей добрай волі з Літвы і Белай Русі” намаганнямі кс. Антонія Валентыновіча касцёл быў пабудаваны ў 1910 годзе, аб чым сведчыць памятная табліца, якая знаходзіцца ўнутры храма. Быў рэалізаваны праект віленскага архітэктара Антона Дубовіка, аўтара праекта Мёрскага і перабудовы 1902-08 гг. Глыбоцкага касцёла Св. Тройцы.

Задарожскі касцёл Найсвяцейшай Багародзіцы Ласкавай быў пабудаваны ў эпоху Рамантызму ў духу гатычнай даўніны. Касцёл з’яўляецца значнай дамінантай на адлеглых абшарах, стаіць на ўзвышшы і бачны за дзесятак кіламетраў.

У 1930-ым годзе, калі Глыбоччына знаходзілася ў складзе адноўленай польскай дзяржавы, у калоніі (быў і такі тып паселішчаў у даваеннай Польшчы.) Задарожжа, Пліскай гміны, Дзісенскага павета пражывала 107 жыхароў, якім належала 187 дзесяцін зямлі. Сёння ў Задарожжы, вёсцы Пліскага сельсавета, Глыбоцкага раёна: двароў – 13, жыхароў – 25.

Задарожжа – цэнтр вялікай каталіцкай парафіі, тэрыторыя якой ахоплівае і даволі значныя населеныя пункты, як Прошкава з яе капліцай Св. Рафаіла. Задарожжа – тое месца, якое часта наведваў наш славуты мастак Язэп Драздовіч. Адзін з яго маляваных дываноў з выяваю задарожскага касцёла зберагаецца ў Глыбоцкім гісторыка-этнаграфічным музеі. Побач з Задарожскім касцёлам некалі знаходзіўся фальварак Якубёнкі - адсюль карані Аляксандра Грына, аўтара "Пунсовых ветразяў". Тут жыў яго дзед.

Уладзімір Скрабатун
Апублікавана: "Вольнае Глыбокае", №11(258) 10 сакавіка 2005 года


Паведамленні