Фальварак | Селішча

Фальварак Селішча

Паводле энцыкляпэдычнага выданьня "Słownik geograficzny Królestwa Polskiego ..." (1889) у 1680 годзе маёнтак Селішча быў уласнасьцю Корсакаў-Сяліцкіх, якія ў 1686 годзе прадалі яго братам Яну Хрызастому і Каспару Францкевічам. У першай траціне ХVIII ст. Селішчам валодалі Язафат Антон Сялява з жонкай Элеанорай з Козелаў. Далей яно было ўласнасьцю Яна Сялявы і трох ягоных сёстраў Марыяны (у сужэнстве Рэвут), Тэклі (у сужэнстве Гецэвіч), Тэрэзы (у сужэнстве Рагоза). У 1743 годзе маёмасьць набывае Міхал Сяліцкі, які ў 1778 годзе аддае яе свайму сыну Язэпу. Ад 1789 году Селішчам валодае сын Язэпа Антон, а пасьля яго спачыну дачка таго самага Язэпа Элеанора (у сужэнстве Кашталінская). Ад 1830 году маёнтак дастаецца ў спадчыну Элеанорыным дочкам Кацярыне (у сужэнстве Кошаль) і Ганьне (у сужэнстве Сялява). Пазьней уладальнікамі Селішча былі Эдвард Сялява і ягоная сястра Кацярына (у сужэнстве Шырын). У 1863 годзе маёнтак Селішча разам з Саланевічамі абыймаў 3005 дзесяцінаў дворскай зямлі і меў 739 рэвіскіх душаў. У 80-х гадах ХІХ ст. Валодаў Селішчам Аляксандар Шырын.

Колішні фальварак разьмешчаны на адлегласьці  1,5-2 кіламэтра на паўночны-ўсход ад мястэчка абапал дарогі Вушачы-Зябкі. Цяпер места гэтае зьяўляецца цэнтральнай сядзібай сельскагаспадарчага вытворчага каапэратыву "Агра-Селішча". Тутака ж знаходзіцца Селішчанскі сельсавет. З аднаго боку дарогі Вушачы-Зябкі разьмесьціўся машынны двор "Агра-Селішча", з другога – адміністрацыйныя і жылыя пабудовы.