Абарончыя ўмацаванні | Агароднікі (Воўчынскі с/с)

Дот каля вёскі Агароднікі

Дот, умоўна абазначаны лічбай VII, знаходзіцца на ўскраіне вёскі Агароднікі Камянецкага раёна. Пабудаваны ў 1940-41 годзе, адносіцца да 3-й роты 18-га АКАБ 62-га УР. Матэр’ял – бутажалезабетон. Меў на ўзбраенні дзьве гарматы калібра 76.2 мм і кулямёт “Максім”.

Дот, агульны выглядФота © Валерий НИКИФОРОВ | Дата: 13/08/2014

Гэты дот адзін з наймацнейшых дотаў 62-га УР, якія засталіся на тэрыторыі Беларусі. Па некаторых звестках ён вёў бой да 18 гадзінаў 23 чэрвеня 1941 года з гарнізонам усяго з 9 чалавек. Мае значныя пашкоджанні як звонку, так і ўнутры (у некалькіх месцах прабітае перакрыццё паміж ярусамі). Зараз у адной з амбразур пастаўленая мемарыяльная дошка ў памяць аб гарнізонах дотаў 62-га УР.

ТабліцаФота © Валерий НИКИФОРОВ | Дата: 13/08/2014

Тлумачэнні для чарцяжоў: літарай К абазначаны калодзеж, трохкутнік у кружку паказвае накірунак аварыйнага выхаду пад полам, а кружок у квадраце абазначае перыскоп. Прастакутнікі абазначаюць гільзаадвод, калі знаходзяцца ў казематах з амбразурамі. У астатніх казематах яны паказваюць дапаможнае невялічкае памяшканне пад полам (ягоны аб'ём чамусьці заўсёды 5 кубаметраў).

Плян 1-га і 2-га ярусаў© Вадзім Шорах

Вадзім Шорах,
даследчая група "Крапіва"