Агароднікі
Агароднікі — вёска ў Воўчынскім сельсавеце, за 59 км на паўднёвы захад ад Камянца, 38 км ад Брэста. У сярэдзіне 19 ст. вёска ў Брэсцкім павеце Гродзенскай губерні. Адносілася да маёнтка Ставы, які належаў графіні Красінскай. Працавала вясковая крама. Паводле 10-й рэвізіі (1857 г.) у вёсцы 234 рэвізскія душы. У 2-й палове 19 ст. ў Воўчынскай воласці Брэсцкага павета Гродзенскай губерні. Агароднікі адносіліся да прыходу стаўскай царквы святога Мікалая, у вёсцы знаходзілася філіяльная царква святога Ануфрыя (да 1865 г. - стаўскі парафіяльны касцёл 1760 г. пабудовы).
Свята-Ануфрыеўская царкваФота © Грода Надзея
Паводле перапісу 1897 г. ў Агародніках 53 двары, 399 жыхароў, хлебазапасны магазін. У 1905 г. 443 жыхары. У 1921—39 гг. у складзе Воўчынскай гміны Брэсцкага павета Палескага ваяводства Польшчы. У 1923 г. ў вёсцы 62 двары, 257 жыхароў. З 12.10.1940 г. вёска ў Стаўскім сельсавеце Высокаўскага раёна Брэсцкай вобласці, на той час 248 жыхароў. У 1940-41 гг. на ускрайку вёскі быў пабудаваны адзін з дотаў 62-га УР. Па некаторых звестках 23 чэрвеня 1941 года гарнізон з 9 чалавек вёў тут бой да 18 гадзінаў.
Дот на ўскрайку вёскі АгароднікіФота © Валерий НИКИФОРОВ | Дата: 13/08/2014
У Другую сусветную вайну на франтах загінулі і прапалі без вестак 12 жыхароў вёскі. З 16.7.1954 г. ў Воўчынскім сельсавеце. З 17.4.1962 г. ў Камянецкім раёне. Паводле перапісаў у Агародніках у 1960 г. - 262, у 1970 г. - 242, у 2005 г. - 42 жыхары. У цэнтры вёскі стаіць праваслаўная царква святога Ануфрыя (былы парафіяльны касцёл), прыход якой лічыцца стаўскім. На паўночна-заходнім ускрайку вёскі знаходзіцца дот 62-га УР.
Крыніца:
Гарады і вёскі Беларусі, Энцыклапедыя, Том 4
БРЭСЦКАЯ ВОБЛАСЦЬ, кніга ІI
Мінск, «БЕЛАРУСКАЯ ЭНЦЫКЛАПЕДЫЯ», 2007