Царква Святой Параскевы Пятніцы | Мікалаева

Параскевы-Пятніцкая царква ў Мікалаеве

Царква Святой Параскевы Пятніцы ў Мікалаеве пабудавана на мяжы ХІХ і ХХ стст. з дрэва, на месцы больш даўняй царквы, на паўночнай ускраіне вёскі. Да сярэдзіны ХХ ст. гэта была Свята-Мікалаеўская царква, прыпісная да Сімеонаўскага прыходу ў Камянцы. Царква лічылася Вяліка-Ельнянскай, верагодна, па ранейшай назве мясцовасці. У канцы 1980-х г. царква перададзена вернікам і асвячона як Параскевы-Пятніцкая.

Пятніцкая царква ў МікалаевеФота © Кузіч Мікола | Дата: 22/04/2012

Храм - помнік архітэктуры рэтраспектыўна-рускага стылю. Асноўны прамавугольны зруб завершаны 5-купаллем і аб'яднаны з 3-яруснай шатровай званіцай (2 васьмерыка на чацверыку) і невялікім бабінцам. Галоўны ўваход аформлены ганкам з франтонам. Архітэктура вылучаецца насычаным разным дэкорам: на гарызантальна ашаляваных фасадах выкарыстаны разныя карнізы, арнаментальныя франтоны, аконныя ліштвы, гарызантальныя цягі, вертыкальныя лапаткі.

Вежа-званіца. ФрагментФота © К. Шастоўскі | Дата: 08/07/2005

У інтэр'еры зала абмежавана ад апсіды ў габарытах асноўнага аб'ёму драўляным 2-ярусным іканастасам з разнымі пазалочанымі царскімі варотамі з 6 авальнымі абразамі-таблеткамі.

Літ.:
1. А.М. Кулагін
Праваслаўныя храмы на Беларусі
Мінск, Беларуская Энцыклапедыя, 2001
2.Гродненский православный календарь
Православие в Брестско-Гродненской земле в конце ХІХ века, Том 1
Воронеж, 1899