Царква Святога Міхала Арханёла | Такары

Свята-Міхайлаўская царква ў Такарах

Міхайлаўская царква ў Такарах узведзена ў 1816 г. на месцы ранейшага храма. Першая царква ў Такарах верагодна пабудавана на мяжы XV/XVI стст., бо ў 1592 г. "паны Такарскія" надалі царкве зямлю. Пазней прыход быў пераведзены ў Унію. У 1816 г. пабудавана новая ўніяцкая Міхайлаўская царква (пасля 1839 года - у Літоўскай праваслаўнай епархіі). У канцы ХІХ ст. прыход царквы налічваў 2734 чалавек у 7 вёсках: Такары, Вілянова, Вулька Пужыцкая, Залессе, Зарэчча, Клюкавічы і Мачулішча.

Міхайлаўская царква ў ТакарахФота © Кузіч Мікола | Дата: 13/05/2012

Царква Святога Міхаіла Арханёла ў Такарах - помнік народнага дойлідства. Храм вырашаны адзіным працяглым прастакутным зрубам, да якога далучаны прытвор і квадратная ў плане апсіда з бакавымі нізкімі рызніцамі. Апсіда арыентавана на захад. Над прытворам на ўзроўні 2-схільнага даху ўзвышаецца чацверыковы ярус званіцы, завершаны 8-гранным барабанам з купалам. Франтальны арачны праём званіцы запоўнены абразом "Святы Міхаіл". Вертыкальна ашаляваныя сцены прарэзаны прамавугольнымі аконнымі праёмамі ў плоскіх дашчатых ліштвах, умацаваны брусамі-сцяжкамі ў прасценках. Над галоўным прамавугольным уваходам размешчана паўкруглая люкарна.

Выгляд ад фронтуФота © Кузіч Мікола | Дата: 13/05/2012

Ва урочышчы Павукі побач з вёскай Мачулішча існавала прыпісная Праабражэнская царква (Пужыцкая), пабудаваная ў 1740 г. святаром Паўлам Адэльскім і прыхаджанамі вёсак Зарэчча, Залессе і Мачулішчы. Зруйнавана ў 1960-я гг. У 2013 г. на месцы даўняга храма ўзведзена Праабражэнская капліца. У 1909-1912 гг. ва ўрочышчы Катэрка (цяпер на тэрыторыі Польшчы) на месцы з'яўлення ў 1852 г. абраза Маці Божай пабудавана драўляная прыпісная царква Божай Маці Ўсіх Тужлівых Радасць (захавалася, прыхадскі храм Польскай аўтакефальнай праваслаўнай царквы).