Касцёл Беззаганнага Зачацця Найсвяцейшай Панны Марыі | Крычаў

Першыя звесткі пра крычаўскі касцёл датуюцца XVII ст. На пачатку XVIII ст. ужо дакладна вядома, што ён быў драўляным і знаходзіўся ў цэнтры горада на вуглу сучасных вуліц Ленінскай і Камсамольскай, там дзе зараз знаходзяцца закінуты будынак пошты і раённы ваенны камісарыят.

У сярэдзіне ХІХ ст. цэнтральную частку Крычава знішчыў жудасны пажар. Згарэлі амаль усе пабудовы, у тым ліку і касцёл. Часова набажэнствы вяліся на першым паверсе так званага Пацёмкінскага палаца, валодаў якім на той час заможнейшы крычавец Стэфан Галынскі. На яго ж грошы, а таксама на грошы вернікаў, у 1855-60 (па іншай інфармацыі 1874) гг. быў пабудаваны новы каменны касцёл. Стварыў гэты архітэктурны цуд у стылі нэаготыкі таленавіты італьянскі архітэктар. Дзякуючы яго майстэрству, касцёл зрабіўся найпрыгажэйшай пабудовай у горадзе. Знутры касцёл упрыгожвалі насценныя роспісы і ўнікальная драўляная скульптура Езуса.

Пасля ўсталявання савецкай улады ў храме размясцілі кінатэатр, а пазней самадзейны драматычны тэатр. У 1934 годзе касцёл быў узарваны.

Андрэй Кузьмін