Парк | Замошша

Больш фотаздымкаў (9) >>

Упершыню ў пісьмовых крыніцах маёнтак Замошша згадваецца ў 1690 годзе ў тарыфе Ашмянскага павета як уласнасць Януша Зяновіча. Янушу Зяновічу належаў таксама і суседні маёнтак Порплішча. Па звестках гэтага дакумента, да маёнтка адносіліся 45 дымоў. Аднак, мабыць, тут кожны такі дым складаўся не з аднаго, а з некалькіх двароў, бо ў дакуменце сустракаюцца такія лічбы як 1/4, 1/6 дыма. У той час, хутчэй за ўсё, ужо існавала капліца, бо ў 1756-58 гг. збудавана новая капліца на месцы старой. У 1795 годзе да маёнтка адносіліся 19 населеных пунктаў. У 1834 годзе ў Замошшы Зяновічу належалі 110 душ. Пазней Замошша перайшло да Багдановічаў. У 1869 годзе памёр уладальнік маёнтка Тадэвуш Багдановіч і, хутчэй за ўсё, менавіта тады маёнтак перайшоў ва ўласнасць Слатвінскіх. Апошнім уладальнікам быў Людвік Слатвінскі. Калі ў 1939 годзе прыйшлі савецкія войскі, ён быў схоплены бальшавікамі і невядома дзе знік. У Замошшы размясцілася вайсковая часць, на тэрыторыі маёнтка збудаваны склад боепрыпасаў №275, які ў 1941 г. пры адступленні савецкіх войскаў быў узарваны. Потым здаралася некалькі выпадкаў, калі на неразарваных снарадах у Замошшы ўзрываліся людзі. Дзесьці ў 1939–41 гг. была знішчана капліца. Пасля вайны на месцы маёнтка збудавана ферма, якая знесена ў 2003 годзе. Ад маёнтка амаль што нічога не захавалася.

Кастусь Шыталь, краязнаўца
e-mail: kastus-sh@mail.ru