Касцёл і кляштар дамініканаў | Полацк

Кляштар дамініканаў у Полацку

Полацкі касцёл і кляштар дамініканаў заснаваны ў 1672 па фундацыі Віленскага каноніка Казіміра Горскага з дазволу Віленскага епіскапа А. Сапегі. Касцёл быў асвечаны пад тытулам святога Дамініка. У 1774 быў закладзены мураваны касцёл. Аднак з-за недахопу сродкаў, яго будаўніцтва было адкладзена да 1801 і завершана ў 1804 г. У той жа год ён быў асвечаны пад тытулам Маці Божай Ружанцовай. Касцёл уваходзіў у ансамбль полацкай Параднай плошчы. У 1837 і 1843 кляштарныя будынкі гарэлі.

Касцёл — 3-нефавая 6-стаўповая базіліка памерамі 30х18,9 м, цэнтральны неф якой завяршаўся паўкруглай апсідай . У інтэр’еры касцёла былі ўбудаваны пяць алтароў, упрыгожаныя разьбой і размалёўкай, на хорах быў 12-галосы арган. Касцёл меў дзва уваходы: першы з боку плошчы быў аформлены порцікам з шасцю іанічнымі калонамі і балконам, на якім быў уваход на хоры, другі — з боку кляштара. Кляштар пабудаваны ў 1781—1804, уяўляў сабой 2-павярховы Г-падобны ў плане корпус з калідорнай нланіроўкай. Першы паверх меў скляпеністыя перакрыцці, другі — драўляныя. Будынкі кляштара былі пакрыты чарапіцай. У комплекс уваходзілі таксама гаспадарчыя пабудовы, сад, палісаднік і каменная агароджа з уязной брамай. Кляштарны двор быў выбрукаваны. У 1864 пасля закрыцця кляштара касцёл стаў прыходскім. Комплекс пацярпеў у час ІІ Сусветнай вайны. Цалкам знішчаны ў 1949 г.